У трыццаць першы раз 31 жніўня і 1 верасня прайшоў Дзень беларускага пісьменства. Фестываль, які на гэты раз ладзіўся ў Івацэвічах, стаў святам адзінства друкаванага слова, літаратуры і народа.
Арганізатары падрыхтавалі насычаную і разнастайную праграму. На цэнтральнай вуліцы, якая стала пешаходнай зонай, размясціліся шматлікія тэматычныя пляцоўкі. Ля гарадскога Дома культуры ў вочы кінулася кампазіцыя “Дзеці лясной школы”, якая ўяўляла сабой хлопчыка і дзяўчынку з партызанскага атрада, якія чытаюць, і дэманстравала, што нават у цяжкія часы нашы дзеці цягнуліся да ведаў. Прыцягвалі ўвагу тэматычныя пляцоўкі: “Беларусь памятае”, “Зроблена ў Беларусі”, “Сучасная Беларусь”, прысвечаныя Канстытуцыі нашай краіны і 30-годдзю інстытута прэзідэнцтва, а таксама – выставы “Мой дом”, прысвечаная Якубу Коласу, Дзяржаўнага літаратурна-мемарыяльнага музея Якуба Коласа і “З Купалам – у сэрцы”, прысвечаная гісторыі музея і асноўным этапам жыцця і творчасці паэта, Дзяржаўнага літаратурнага музея Янкі Купалы. Шмат станоўчых уражанняў засталося ад наведвання пляцоўкі дзяржаўных выдавецтваў “Беларусь”, “Мастацкая літаратура”, “Звязда”, “Адукацыя і выхаванне”. Запомнілася літаратурная пляцоўка музеяў устаноў адукацыі “Мой край – мой гонар”.



Загадчык аддзела бібліятэчнага маркетынгу Маларыцкай РЦБС Галіна Кучына: "Дзень беларускага пісьменства я наведваю не першы раз. Убачанае і пачутае ў Івацэвічах выклікала шмат станоўчых эмоцый. Найперш – гэта чарговая сустрэча з не толькі з калегамі, абмен з імі вопытам работы, абмеркаванне планаў на будучае, але і з пісьменнікамі. Была магчымасць таксама паглядзець кніжныя навінкі, патрымаць іх у руках, пагартаць.


На фота: Загадчык аддзела маркетынгу Маларыцкай РЦБС Кучына Г.У.; дырэктар Баранавіцкай ГЦБС Рудкоўская Т.А., дырэктар Баранавіцкай РЦБС Лайша Т.М.

У адным з павільёнаў на XXXI Дні беларускага пісьменства была прадстаўлена і Маларыцкая раённая  бібліятэка. На банерах “Праекты публічных бібліятэк Брэсцкай вобласці” былі размешчаны два праекты.



Першы з іх – “Маларыта: маленькі горад – вялікая гісторыя”. Па QR-кодзе можна  хутка перайсці на інтэрнэт-праект, дзе размешчана цікавая інфармацыя пра Маларыту. Гэта своеасаблівая энцыклапедыя ў электронным варыянце. Яна пастаянна папаўняецца інфармацыяй па 14 раздзелах: “Легенды”, “Сімволіка горада”, “Вуліцы нашага горада”, “Мікратапаніміка”, “Маларыцкі народны касцюм”, “Рамёствы”, “Грачаны хлеб”, “Гісторыя горада” (на беларускай і рускай мовах), “Кіраўнікі раёна”, “Краязнаўцы”, “Славутасці”, “Відэа”. Асаблівы гонар – раздзел “Майстры народнай творчасці”. У ім у алфавітным парадку размяшчаюцца фотаздымкі, а таксама звесткі пра 73-х майстроў раёна: якім відам мастацкай дзейнасці яны займаюцца, з якімі матэрыяламі працуюць, расказваецца і пра асаблівасці творчай манеры кожнага майстра, тэматыку яго вырабаў.
Увазе наведвальнікаў фестывалю быў прадстаўлены і патрыятычны праект “Марш па дарогах памяці”, які прымеркаваны да 80-годдзя з дня вызвалення Беларусі ад нямецка-фашысцкіх захопнікаў. Гэта – каталог помнікаў, воінскіх пахаваннях, магіл ахвяр фашызму Маларыцкага раёна. QR-коды адкрываюць поўнае апісанне канкрэтнага помніка ў электронным выглядзе. Гэта дае магчымасць распрацоўкі індывідуальнага маршруту і самастойнага наведвання кожнага памятнага месца. Я назірала, што ва ўдзельнікаў і гасцей свята была пэўная цікавасць да нашых праектаў, бо яны сканіравалі сваімі мабільнымі тэлефонамі QR-коды. Магчыма, гэта паспрыяе турыстычнай прываблівасці нашага краю".




                                                                                                           Мікалай НАВУМЧЫК.