Погода в Малорите    

  

2018 год - Год малой Радзімы. У аддзеле бібліятэчнага маркетынгу выдадзены зборнік вершаў маларыцкіх паэтаў аб родным краі. 

На Маларытчыне ёсць таленавітыя паэты, выдатныя і самабытныя майстры слова, вартыя ўвагі чытача. Іх можна назваць спевакамі роднага краю, якія ў паэтычнай форме імкнуцца данесці прыгажосць і спрадвечныя каштоўнасці да свядомасці кожнага з нас. Мясцовыя майстры пяра праз створаныя мастацкія вобразы захапляюць прыгажосцю родных краявідаў, дораць ціхую радасць зносін з прыродай, пасяляюць у душы гармонію, суцяшэнне і спакой.  Яны, часам, не зусім дасканалыя ў кампазіцыйнай і рытмічнай арганізацыі вершаваных радкоў, не заўсёды ў іх вытрыманы вершаваны памер, сустракаюцца стылістычныя памылкі… Аднак гэтыя вершы валодаюць цудоўнай якасцю: духоўнай і маральнай чысцінёй, самабытнасцю. Усе яны па-мастацку праўдзівыя, таму і вартыя ўвагі. Творы мясцовых паэтаў прасякнуты асаблівай унутранай цеплынёй, сардэчнасцю, асабістым светаўспрыманнем, часам маюць нестандартнасць думкi, але заўсёды – даверлiвую шчырасць, глыбiню лiрычнага перажывання і пачуцця. Такія творы ідуць з глыбінь сэрца.  Кожны радок вершаў паэтаў-землякоў прасякнуты любоўю да малай Радзімы, да бацькоўскага дому і таму не можа не крануць сэрцы. Чытаючы іх, адчуваеш сваё дачыненне да надрукаванага: настолькі яны блізкія тым, хто нарадзіўся, вырас і жыве на Маларытчыне. Спадзяемся, што пасля знаёмства з вершамі мясцовых паэтаў, Маларыцкі край стане для чытача яшчэ больш блізкім і родным.
Прыемнага прачытання твораў паэтаў-землякоў!